Á mínum yngri árum voru ostakökur ekki efstar á óskalistanum þegar röðin kom að gómsætum veitingum. Það var ekki fyrr en ég byjaði að vinna í Landsbankanum fyrir u.þ.b. 12 árum að ég kynntist þessari dásemd. Samstarfskonum mínum í bankanum líkaði vel við ostakökurnar og voru þær oft á boðstólum á föstudögum í kaffitímanum. Það var einmitt í einum þessara kaffitíma sem ég smakkaði í fyrsta skipti ostaköku. Síðan þá eru mörg ár liðin, ég farin að vinna sem kennari og enn elska ég ostakökurnar.
Uppskrift:
Botn:
1 pakki Maryland big and chunky kex
6 oreokexkökur
5 msk brætt smjör
2 msk sykur
Fylling:
1 dós rjómaostur (400 g)
60 g sykur
4 dl þeyttur rjómi
2 msk Royal hlaupduft
Jarðarberjasósa til skrauts (má sleppa) (hægt að gera með því að sjóða saman 3 msk af jarðarberjasultu og 3 msk af vatni í smá stund)
Aðferð:
Kexið er mulið í matvinnsluvél, bræddu smjöri og sykri bætt saman við. Blandan sett í botninn á eldföstumóti, skál eða öðru sem hentar. Gott að geyma 3 msk af mulningnum til að skreyta kökuna.
Rjóminn þeyttur, geymdur í skál til hliðar. Rjómaostur og sykur þeytt vel saman. Rjómanum og duftinu blandað varlega saman við. Fyllingin er sett ofan á botninn. Má setja jarðarberjasósu yfir ásamt mulningnum.
Gott að kæla kökuna í nokkra klukkutíma fyrir notkun.
