Er ekki tilvalið að hita sig upp fyrir landsleik Íslands við Króatíu og skella í eina fótboltaköku.
Landsliðskaka hentar vel fyrir afmælið eða önnur skemmtileg tilefni.
Ég á frábæra samstarfskonu sem átti 40 ára afmæli um daginn. Það vildi svo heppilega til að hún er fyriverandi landsliðskona og nú vinnur hún með íslenska kvennalandsliðinu. Ég skellti í þessa köku til að gleðja hana í tilefni afmælisins. Kakan hitti að sjálfsögðu beint í mark.
Leiðbeiningar:
Ofnskúffustærð af súkkulaðiköku sjá uppskrift hér
Smjörkrem sjá uppskrift hér
Sykurmassi – blár í grunninn, hvítur til að skreyta með
Matartússtpenni eða matarmálning – svart og rautt
Aðferð:
Smjörpappír klipptur til líkt og treyja. Pappírinn lagður á kökuna og hún skorin út í. Smjörkremið smurt yfir, sykurmassinn flattur út og settur yfir kökuna.
Hálsmálið á treyjunni er gert með því að fletja út massa og skera hann í mjóa ræmu. Ræman er síðan límt með sykurmassalími á kökuna. Kemur vel út að setja hvítan sykurmassa undir.
Hvítur sykurmassi skorinn til eins og á mynd. Rauðar línur teiknaðar á kökuna. Merkin eru gerð með sykurmassa sem er skorinn út og málaður með matarmálningu og matartússpenna.
Hér fyrir neðan er ég búin að setja stafina á kökuna ásamt aldursárinu. Alltaf gaman að leika sér með kökurnar. 
